query_builder Fri 25 Mar 2022 10:56 am
visibility 525
ഒറ്റപ്പാലം : അമ്പലപ്പാറ പഞ്ചായത്തിലെ ചുനങ്ങാട് മേഖലയിൽ തെരുവ് നായ്ക്കളുടെ ആക്രമണത്തിൽ 24 പേർക്ക് പരിക്കേറ്റു. പരിക്കേറ്റവരിൽ പാറക്കുളത്തിങ്കൽ അരുൺ എന്ന കുട്ടിക്ക് തലക്ക് ആഴത്തിൽ മുറിവേറ്റിട്ടുണ്ട്. നിലവിൽ ലഭ്യമായ വിവരമനുസരിച്ച് അഞ്ചോളം പശുക്കൾക്കും കടിയേറ്റതായാണ് അറിയുന്നത് . പരിക്കേറ്റവർ ഒറ്റപ്പാലം താലൂക്കാശുപത്രിയിൽ പ്രാഥമിക ചികിത്സ തേടിയ ശേഷം പേ വിഷ പ്രതിരോധ കുത്തിവെയ്പെടുക്കാൻ തൃശൂർ മെഡിക്കൽ കോളേജാശുപത്രിയിലേക്ക് പോയിട്ടുണ്ട് വാരിയത്ത്കുന്ന് , മുരിക്കുംപറ്റ , പിലാത്തറ, ഒന്നാം മൈൽ , വാണി വിലാസിനി പ്രദേശങ്ങളിലാണ് പേപ്പട്ടി ആക്രമണമുണ്ടായത്. പരിക്കേറ്റവർക്ക് അടിയന്തിര സഹായം നൽകാൻ പഞ്ചായത്ത് ദുരിതാശ്വാസ ഫണ്ടിൽ നിന്ന് രണ്ട് ലക്ഷം രൂപ അനുവദിച്ചതായി വൈസ് പ്രസിഡന്റ് ടി.ശശികുമാർ അറിയിച്ചു . പരിക്കേറ്റവരെ ആശുപത്രിയിലെത്തിക്കാൻ RRT വളന്റിയർമാർക്ക് നിർദേശം നൽകിയതായും ആവശ്യമായവർക്ക് വാഹന സൗകര്യം ഏർപ്പാടാക്കിയതായും ശശികുമാർ അറിയിച്ചു . സ്വന്തം നിലക്ക് പോയവർക്ക് രേഖകൾ ഹാജരാക്കിയാൽ സാമ്പത്തിക സഹായം അനുവദിക്കും. ആന്റി റാബിസ് വാക്സിൻ കുത്തിവെയ്പ് എടുക്കാൻ തൃശൂർ മെഡിക്കൽ കോളേജിൽ പോയവർക്ക് വാക്സിൻ പുറത്ത് നിന്നാണ് വാങ്ങേണ്ടി വരുന്നതെങ്കിൽ രേഖകൾ ഹാജരാക്കുമ്പോൾ അതിനാവശ്യമായ തുകയും നൽകാനും പഞ്ചായത്ത് അധികൃതർ തീരുമാനിച്ചിട്ടുണ്ട് .